prima parte di u testu

siconda parte di u testu

Eccu u listessu testu, più lighjibule è cù un'ortografia più muderna :

I grataghji fuligjinosi

In quell’anni, cusì luntani (1921-26) sta puesia era cantata in la strada è le strette vechje, cù a cagliazza guasi nuda, à fior’di scarpi è ancu di pedi, è « i grataghji fulighjinosi », di petre stanche, affumaticati da uttobre vinutu è tuttu l’invernu, riscaldavanu l’aria ma li davanu, è ancu à la ghjente, un culore gialliciu francu i zitelli forse à la faccia rossa è guasi turchina in quelli tempi frischissimi.

In lu grataghju, u ziglione hè à mezu, fattu di tofu impastatu, battutu, allisciatu ch’ellu cuntene una spezia di mobulu di quattru pedi è quattru tavule furtissime. Stu ziglione purtava i cipponi grossi, infiammati è u calore è u fume cullavanu fin’à a grata à e righe nere, sgrignate, carche di castagne fresche, luccicante. Calore brusgente ma caldu à lu core è chì ci francava di tuttu male ; causgiulelle luminose cum’è piccule stelle, sciuppittavanu – attenti à paracci eramu tutti ! -, pezzi di deda grassa fumicosa, par schiarisce appena quellu musgingu, fulighjinosu sì ma vivu, dolce, senza pinseri par noi, i zitelli.

Cusì era u mondu tandu in li limiti stretti di e nostre muntagne ingiru.

 Una mane prestu di dicembre, a neve carcava e cime è a nostra pezza fulighjinosa s’apria, divintava fresca, sposta à tutti i currenti d’aria. Frumbavanu i scarpi stacchittati à passà è à vene par una ghjurnata à stantà. Ci vulia à pistà e castagne oramai secche, scurticalle, spulillalle è appruntalle bè, poi macinalle à u mulinu.

Un cippone largu di castagnu, sigatu, lisciu, hè fora in la stretta di a nostra casa. Annantu, una « strapunta » di vechji sacchi di « jute » è di stracci par francà u ceppu di a pistera. Ci vole ch’ellu sia untu suvente issu sopraceppu cù una lavatura d’acqua è di farina. Un saccu di tela (suvente PTT) forte, longu, è prontu pà u pistadore, un omu ch’impiegava a so vita dura par campà cun a zitella, una so figliola.

È, prestu, ci vole à assiste u pistadore è li si porta i spurtelli di castagne secche chì babbu facia cascà da a grata à un tempu di quellu chì pesta. Ellu, à duie mane, piglia u saccu chì tene, in lu fondu, un mezu bacinu di frutti secchi è mena annant’à u ceppu, pisendu à pieni sforzi, à manca, à dritta, sopra à lu so capu, suffiendu è sudendu, ma cun un sguardu dolce, una bocca cù denti pochi ma simpatica. Mi piacia.

A pilufa di e scorze castagnine è i frutti guasi nudi, empienu i sacchi di livanda (100 chilò) è a stretta piglia l’adore di e castagne secche è diventa bisgia. È eiu, ghjilata è pocu utule, è l’altri dinò, ricivemu sta polbara di fiuretti  fini cumè quelli di u radichju di « Larousse ».

Poi, vene u tornu di u spulillume. Ritta, un spulellu largu tinutu à duie mane, mamma u face saltichjà, senza sfiatà, à un tempu rigulatu è, cusì, spica, cù sforzi è quasi a maestà di a faccenda ben’fatta, e castagne è a pilufa chì casca in tarra. Cumè sta pilufa bula ! Ma cum’elli sò boni i mulloni !

Dopu, mamma posa annant’à una panca è tamantu stacciu di tola di farru passa è vene, fisca, briona. Par pulisce bè ogni castagna, ci vole un cultellu è tanta fatica è tanta pacenza ! Altri sacchi in tela bianca più fina tenenu e castagne scelte è, quandì a pulizia di a stretta hè compia, si và à spargnesi frutti in lu fornu lasciatu caldu à tempu par l’ultima  furnata di pane. Issu travagliu di spargnele è di sortele isse castagne, intrendu in lu fornu caldettu mi tinia è mi tene  sempre cummuziunata cumè tutta a cultura è a farina, da a diraschera di i pulloni à u mulinu.

Cusì sò, oghje, suvitendu, in lu me capu è in lu me core, i sumerelli caldi è dolci, balancendu, cù un passu sicuru, e so belle croce annant’à lu spinu.

E cariche purtate, cusì stantate, vanu ver d’un mulinu infarinatu, à u longu di a Tavulella (Le Porto), e so macine di petra, a so farina inzuccarata, fondu d’una vita dura, d’un invernu ghjacciatu, sempre biancu.

Ma cusì pienu ! Chì ci hè tantu da fà è senza lume.

U 12 di farraghju d u 1998, Vicu.