Dui ponti ghjinuvesi si trovanu in lu rughjone, è u fattu ch’elli sianu pocu alluntanati l’unu da l’altru tistimunieghja sempre oghje di l’impurtanza di sta strada pà e pupulazione tandu.

A custruzzione d’issu ponte, chjamatu Ponte Vechju o dinò Ponte à a Pianella (sicondu l’anticu nome di u fiume u Portu), hè dicisa in lu 1715 da e cummunità d’Evisa è d’Ota chì ne sò i maestri di l’opara (oghje hè annant’à a cummuna d’Ota). Ùn cuminciaranu cà uni pochi d’anni più tardi i travagli. Si sà solu ch’elli eranu in corsu in lu 1721 è ch’elli sò stati intarrotti in lu 1727. E privisione di e spese s’alzavanu à 4000 lire.

Ùn ci hè cà una sola arca, è da una parte di u ponte una nichja ascundia a statula (oghje sparita) d’un santu chì prutigia l’omi è e bande chì trasfuravanu quindi.

Hè statu classificatu cum'è munumentu storicu u 29 di nuvembre di u 1976.

U prima ponte chì si trova partendu da Evisa par fà « a Spilonca » si chjama u Ponte à Zaglia. U so aspettu hè simule à quellu di a Pianella, puru ch’ellu sia statu dannificatu. Ci si ghjunghje dopu 1 ora 30 di marchja falendu pianu, ma una mez’ora basta par andacci s’ella si face a partanza da Ota. Tandu a strada hè pianura.

Era in prugettu issu ponte da u 1712, ma ùn hè statu custruitu cà in lu 1797. Face chì u nome di « ponte ghjinuvese » ùn hè ghjustificatu à pienu, benchì l’architettu fussi originariu di a pinisula taliana. A man’d’opara è a roba da a custruzzione eranu pruviste da a cummuna d’Evisa. Face sempre parte d’issa cummuna. Era suppostu d’esse fattu cù 3 arche, ma mancanza di soldi anu fattu un ponte cù una sola arca. Ghjuvava da faciulità a cummunicazione trà a pieve di Vicu è a Balagna. Hè statu classificatu cum'è munumentu storicu u 26 di ghjugnu di u 1990.