● In lu circondu di Marignana, annant'à i tarreni cummunali di Cristinacce, sò poste e ruvine d'un paese tralasciatu chjamatu u Tassu. Si pò truvà infurmazione à stu prupositu in stu situ, indè vo scatulisciarete assai fatti riguard'à u paese di Cristinacce.(andà in la rubrica "le hameau du Tassu")

Si pò righjunghje l'anticu paese in circa 20 minuti à pedi partendu da una strada chì principia à vicin'à l'Ustaria di a Rota. L'ustaria hè un casamentu biancu situatu dopu u campusantu di u paese, di sopr'à u stradò chì và in Evisa.

Eccu e pusizione rilative di Marignana à dritta è di u Tassu à manca à l'inghjò

Ci si pò andà ancu più prestu partendu da a parte suprana di u paese par mezu d'una pista : appena innanzu di ghjunghje à e prima case di u paese (i Pastini - da vede a rubrica "Strette è carrughji") s'avvede sott'à u stradò una pista di tarra chì fala in la machja. Basta à piglialla è si ghjunghje in lu paese prestu prestu. Saria risicata à pruvà à viaghjà annant'à 'ssa pista cù una vittura urdinaria : un 4x4 hè più cà cunsigliatu . Ma a manera più apprupiata d'andacci hè di viaghjà à pedi. Eccu sottu a so pusizione rispett'à u paese di Marignana è u Ponte di a Tavulella :

© IGN PARIS 2007

Ligenda : 1 : Marignana ; 2 : u Tassu ; 3 : u Ponte di a Tavulella ; 4 : a pista chì parte da a strada ; 5 : l'andatu chì parte da l'Ustaria di a Rota

● Cum'è no l'avemu vista in lu capitulu "Storia di a pieve", u paese di u Tassu era dighjà mintulatu ind'una lista di e cummunità di u rughjone in lu 1485. Un censu di u 1537 c'insegna chì a pupulazione s'alzava à 95 abitanti tandu. U rollu tinutu da u paese era impurtante assai postu ch'ellu si truvava à l'incruciata di parechje strade mulattere ch'assicuravanu e tramutere da un paese à l'altru. Ghjuvava à tagliu paru à i pastori Niulinchi durante l'impiaghjera o a muntagnera. A criazone di u stradò dipartimintale ch'arrochja à Marignana l'hà cacciatu u so ghjovu, è s'hè spupulatu à pocu à pocu. L'ultimu abitante di u paese si ne hè mortu in lu 1935 (da vede quì). In lu sittanta, uni pochi di "hippies" anu dicisu di stallassici par avvicinassi da a natura ma ùn ci sò stati tantu. Di frescu, sott'à l'iniziativa di l'associu marignanese "Scopre", hè stata acconcia a ghjesgia (tettu rinfurzatu, pittura d'una fresca ingrentu) è ci hè urganizata una messa ogni 29 di ghjugnu.

Ne pudete vede calchì fottò quì sottu :

 

© IGN PARIS 2007