À ch’hà battutu in Corsica for’di i stradò, par forza hà rimarcatu numarosi muri è strade inchjappate. Suvente sò discreti, oramai piatti ch’elli sò da a lamaghja è a murza. Sò i tistimonii di a vita di i paesi di tandu, quand’ella ùn c’era ancu a vittura è ch’elle si facianu i viaghji à pedi o cù u sumere. E parsone anziane anu cunnisciutu ‘ssa vita, ind’elle eranu altre e rilazione trà e cummunità paisane : e strade ùn suvitavanu e listesse valle è ùn francavanu e listesse bocche cà i stradò ughjinchi, face ch’a ghjente avia un’ altru raportu cù a distanza – distanza geugrafica di sicuru, ma dunque ancu distanze « cummirciale » è linguistica.

U più i muri ghjuvavanu da dilimità e zone pratichevule da e bande. Ma si truvavanu dinò long’à strade. Appuntu e strade eranu belle da più à menu, sicondu a so impurtanza pà e rilazione è i tramuti trà i paesi : inchjappatura pocu curata pà e strade sicundarie, invece era sempre assai più travagliata a chjappata quand’ella era utule à i tramuti. In particulare quella chì piglia par Femina Morta, o quelle di a Spilonca è di Piana, sò abbastanza spittaculare è fermanu in istatu bonu ancu à i ghjorni d’oghje.