Hè u nome di a ghjesgia di u paese di Marignana, numinata sicondu u santu patrone di u paese. Datu chì a data di a criazione di u paese hè scunnisciuta (da vede u capitulu "Storia di a pieve"), ùn si sà mancu a data di a custruzzione di a ghjesgia, ma sicuramente si saranu prudutte à tempu o pocu ci manca. Fattu si stà ch'ella esistia dighjà in lu 1589, postu ch'ella era discritta tandu cum'è vargugnosa, scunviniente è ancu misara da Munsignore Mascardi, in carica di stabulisce un irraportu à prupositu di u statu di l'edifizii riligiosi in la pieve. Era dinò u casu di parechje ghjesge in lu rughjone, si pò dì di tutte, è a causa iscia di sicuru da a puvertà di i paesi. U sulaghju era fattu di lastracu (tarra battuta), i muri eranu spruvisti di purtelli è u tettu ùn ascundia mancu più da l'acqua piuvana. Più tardi u so gradu hè statu alzatu à parochja  . Ne hà risultatu un ingrandimentu di u core in lu 1686 è un allungamentu di a nave in lu 1698. Ci hè da nutà l'aghjunta di duie cappelle appicciate trà u 1702 è u 1708. Hè dinò stata ingrandata, è ancu arcata, in corsu di u 19^imu seculu. Hè statu arrizzatu un campanile in la siconda mità di u 19^imu seculu.

Eccucine une poche di futtò :