In cima à u Capu à l'Acella (Capu Sant'Agnulu pà i Cristinaccesi, è Capu Sant'Anghiulu annant'à e carte IGN) chì suprana a Bocca à Seve, poste à 1272 metri d'altitudine, ghjacenu e ruvine d'una cappella. Si ne sà puchissimu, ma sicondu Geneviève Moracchini-Mazel chì ci hè cullata, ci si trova dui edifizii succissivi. U prima saria prirumanicu, è l'altru rumanicu. Saria stata una munacia, cum'è a cappella di Santa Degna, ci hè à dì  ch'ellu ci stava un monacu arimitu (chì campava d'agricultura è di bistiame) chì dava alloghju è cibu à a ghjente chì traficava quindi. Era incaricatu d'intratene è di badà à a cappella.

Infatti sopr'à locu, si pò vede muri sprufundati (u prima d'aostu di u 2007, una parte di u muru era ritta, ma nulla pò varantisce ch'ella ùn sia l'opara di calchì marchjadore) ma denduci retta, s'induvina a prisenza d'un murettu sottupostu, è mezu cà rittu , invaditu da l'arbigliule è a murza. Dui quadri parenu di fà da altare, è fatti chì si ponu sempre vede i resti d'una tribuna (=abside). Sempre d'apress'à Geneviève Moracchini-Mazel, sta sorte di santuariu si trova in tutte e tappe impurtante di e muntagnere è e impiaghjere.

Da sapè cumu andacci, da vede a rubrica "Spassiate".