U Vaccarecciu hè u nome d'un fiumecellu chì corre da sott'à a Bocca à e Fughjichje è chì cuntinueghja cù a Spiscia di l'Aia Vavona, ma dinò quellu di u castagnetu chì si trova ind'isse loche.

Si parte da a Bocca à u Mammucciu è cum'è pà u Pinzolu (spassiata 1), ci vole à piglià e piste e più à dritta. Dopu à pocu pressu 10 minuti di cullata, ci hè un pianu (locu chjamatu Pianu Maiò). Circà a marca aranciu à manca è falà ind'un castagnetu, chì s'arrochja prestu.

Tandu s'avvede dighjà u Golfu di Saone, è s'avvidarà sempre megliu à misura chì si marchja. Oramai a strada hè piatta o pocu ci manca. Si passa dananz'à  una croce (ch'indica ch'un Cristinaccese hè mortu ind'istu locu assai tempu fà), è si và fin'à una chjarinosa (scrittoghju "Source 300 mètres") chjamata a "Culletta à u Prunu". Si pò circà a surgente : ci vole à truvà a casetta di i cacciadori (appena à l'insù di a strada), è andà versi u nordu daret'à un arbure. Sì a via suvitata hè a bona, si truvarà prestu una traccia chì basta à suvità fin'à a surgente.

Par cuntinuà fin'à u Vaccarecciu, basta à falà suvitendu a strada nurmale. Dopu 15 minuti di marchja, si ghjunghje à una casetta abandunata : 10 metri in là à dritta, a siconda surgente, detta di u Vaccarecciu.