1) u Pinzolu : da u stadiu di Marignana à u Pinzolu (996 m, senza nome IGN)

 

Partanza : a Bocca à u Mammucciu 824 m, dopu u stadiu di Marignana à e Pasturecce
Distanza : circa 1,8 km (andà)
Slivellu : circa 172 m
durata : 20-30 minuti (andà)
Difficultà d'orientazione : alcuna annant'à a pista, poca lasciata a pista
Difficultà fisica : poca
Rimarche : attentu à ùn sguillà micca annant'à a pista falendu, piglià cannuchjali

 

 

Carte

© IGN PARIS 2007

 

 

 

U Pinzolu hè u nome di a cima marcata 996 metri annant'à e carte IGN ma spruvista di nome, à u livante di a Culletta à e Conche. Hè un locu cunnisciutu bè da i Marignanesi, è videvule da tutti i paesi di l'alta pieve.

u Pinzolu vistu da e Conche, è in fondu u paese di Cristinacce

Si parte da a Bocca à u Mammucciu, insignata da una croce bianca. Piglià a pista chì colla à dritta è sceglie sempre e piste e più à dritta. Si colla par una pista di tarra, à volte arritta abbastanza. Si varca un fiumicellu (o un pezzu di tarra croscia, si dipende da a stagione) ind'una girata è prestu s'avvede dui pulloni isulati, da ogni cantu di a pista, chì infatti sò i più alti. Ghjuntu à u so livellu, lascià a pista è suvità a traccia à dritta par calchì dicina di metri. Si scala ind'una chjarinosa in pendita dolce cù castagni à l'inghjò. Un falà micca è cuntinuà drittu drittu fin'à a vegetazione chì pare di fà da muru in faccia à sè. Tandu, truvà a traccia à dritta frà e sepule, è dopu uni pochi di metri s'avvede u latu pitricosu di u Pinzolu. Righjunghjelu, è prufittà di a vista sopr'à a parte alta di u rughjone.  In particulare, i quattru paesi di l'alta pieve sò visibuli.

 

vista da u Pinzolu. Da manca à dritta : Chidazzu, Evisa, Cristinacce è Marignana

vista di Chidazzu

vista di Marignana

vista à a luntana di Cristinacce

vista d'Evisa

vegetazione à vicin'à u Pinzolu

 

 


Vista da u Pinzolu

 

 

 

Vultà