12) u Capu d'Ortu, 1294 m : da "Les Roches Bleues" à u Capu d'Ortu
Partanza : | "Les Roches Bleues", innanzu di ghjunghje à a Piana, 428 m |
Distanza : | circa 4,5 km (andà) |
Slivellu : | circa 900 m (andà) + 50 m (vultà) |
durata : | 2 - 3 ore (andà) |
Difficultà d'orientazione : | poca |
Difficultà fisica : | mudarata fin'à a prima cansa, alcuna trà a prima cansa è l'ultima, abbastanza difficiule pà a cullata finale |
Rimarche : | suvente à l'ombra |
Carte |
© IGN PARIS 2007 |
|
A partanza si face da "Les Roches Bleues". A cullata pò dà difficultà à certe parsone ma ùn dura cà trà una mez'ora è 45 minuti. In particulare s'arrochja un pizzatellu di a furesta di a Piana innanzu di ghjunghje à u sicondu scrittoghju. Ci sò dinò belle viste versi u mare è u Monte Sanincu.
Ghjuntu à u sicondu scrittoghju, accorre di sicuru à piglià a dirizzione Capu d'Ortu. Prestu prestu si ghjunghje ind'un castagnetu chjamatu Palani...
...è dopu un antru scrittoghju indica a strada da suvità.
Calchì dicina di metri in là, dui scrittoghji pruponenu duie vie par righjunghje u Capu d'Ortu. Pà a spassiata discritta quì, hè a dirizzione à manca (chì face andà "drittu") ch'hè stata scelta. Face arruchjà un'antra parte di a furesta di a Piana, sempre à l'ombra. Dopu quessa, si scala ind'un locu pitricosu, è si gira piuttostu versu dritta. Sciutu da a furesta, si pò avvede a Paglia Orba à a luntana, cù un prufilu scunnisciutu, è dinò u Capu d'Ortu è unu di i Trè Signori vicini vicini.
Dopu u scrittoghju, ci hè una vista versu a Piana, è una piccula difficultà d'orientazione : à un momentu datu, dopu una parte pitricosa chì compie à l'orlu d'una furesta, pare ch'ella sia persa a strada ghjusta mancanza di cairn o causa di cairn mal'piazzati. In irrialità, ci vole à trincà à manca par entre in lu boscu. Subitu subitu l'andatu torna à parte à dritta è s'avvedenu i cairn.
A Bocca di Piazza vista da l'insù.
Un pocu più in là, un iscrittoghju insegna a strada, chì tandu fala un suppulu.
L'ultimu scrittoghju indica l'andatu s'ellu ùn si vole passà pà a Foce d'Ortu. Cumencia cù una cullata mudarata.
Si franca una bocca chjuca è senza nome è subitu dopu si passa davant'à una facciata tutta tafunata.
Dopu ci sò torna cullate arritte.
Appena innanz'à a cullata finale, si vede un arbure sulignu.
A cullata finale hè abbastanza longa, cù une poche di rimpianate ogni tantu.
In fine, si ghjunghje in cima. Da quassù : vista versu l'internu di e tarre è u Capu à u Monte in particulare. Si vede à Ota è à Evisa, è cù un lume apprupiatu si pò avvede ancu à Marignana è à Cristinacce.
U Capu di u Vitullu hè una cria più altu (1331 m), da culand'à a Foce d'Ortu.
E viste versu à Portu sò magnifiche.
A vista versu dui di i Trè Signori hè abbastanza spittaculare.
Vista panuramica di u Golfu di Portu.
Vista à 360 gradi da a cima.