14) u Capu à u Monte, 1110 m : da Chidazzu à u Capu à u Monte
Partanza : | Chidazzu, una casa di sopr'à u stradò, 660 m |
Distanza : | circa 5 km (andà) |
Slivellu : | 450 m |
durata : | 2 - 3 ore (andà) |
Difficultà d'orientazione : | alcuna fin'à un pocu innanz'à Campisulcu, ma parechje tracce par entre in lu "tunnellu", orientazione à vista in la cullata di u Capu à u Monte, intuizione è ghjudiziu nicissarii par isceglie e vie bone. |
Difficultà fisica : | abbastanza difficiule pà a cullata di u Capu à u Monte |
Rimarche : | dopu u "tunnellu" hè assai spostu à u sole. Mancanza d'andatu è si sguilla assai. Mani suvente richerse. Firmà sempre attenti. |
Carte |
© IGN PARIS 2007 |
|
ringrazià tantu à Antoine chì m'hà guidatu fin'à a cima è m'hà insignatu issi lochi.
Si parte da u paisolu di Chidazzu. Una strada principia long'à una casa à l'insù da u stradò. A strada hè u più di u tempu sustinuta da muri à u principiu.
Si passa par l'Affaccatoghja, u Ghjineparu (prununcia : ghjinè-paru) è si ghjunghje à u Razu, ind'ella ci hè una casetta cù u tettu sprufundatu.
Cuntinuendu si trova un'antra casetta.
Si passa par un bellu castagnetu è da mez'à e frasche si vede u Capu à u Monte.
Si darà capu à un pullone tamantu...
...è à duie sapare, dette " e Gruttelle" un pocu innanzu di ghjunghje...
... à Campi Sulcu, ind'ellu ci hè duie belle casette. Semu oramai à u pede di u Capu à u Monte (da vede a pusizione d'una casetta di Campisulcu in la futtò di dritta, quaghjò à manca) è a strada era piana ad avà.
Quì ci vole à pricisà chì e strade sò almenu duie, è ch'ellu ci vole à lascianne una par piglianne un' antra da pudè cuntinuà. Hè megliu à esse accumpagnati da calchì omu chì cunnosce issi lochi. Ghjuntu à l'ultimu castagnu, accorre à lacà a strada (chì parte piuttostu à manca ver'di a Femina Morta) è à andà à dritta versi ciò chì pare d'esse l'intrata d'un "tunnellu"(da vede a prima futtò) di vegetazione (cù un cantellu postu in tarra dananzu).
Si viaghja circa 700 metri (cullata) ingrent'à u "tunnellu".
A fine di u "tunnellu" hè ghjustu sott'à a Bocca à u Partusellu, è da quallà ci sò dighjà belle viste : u Capu d'Ortu (futtò à manca), u Golfu di Portu (in lu centru) è u Capu (o u Pettu) à u Tarraghju fidiendu à manca (futtò di dritta)
Tandu ci vole à piglià l'ultima cullata, ritta ritta è senza traccia (altra cà quelle di e capre). Si deve stà attenti da sceglie a via a più faciule. Suvente sò richerse e mani, è si sguilla assai, ciò chì rende u sforzu più pinibule. Di più l'itinerariu hè oramai spostu à u sole. Ci hè parechje cime. Ind'una cima suttana, emu postu una croce cù scritte e nostre casate è "sò cullati", in più di l'annu. Eccu sta croce è Marignana in Fondu.
Da chivi, u Golfu di Portu hè piattu da a cima principale. Da pudecci andà annant'à issa cima, accorre à falà appena è à truvà un'antra manera di cullà. Un'attinzione particulare hè dumandata, causa di spinnatoghji è numarosi missoghji, è di cullate belle arritte.
Bella vista di u Capu d'Ortu, ghjustu di punt'à noi.
Di manera stunante, a cima di u Capu à u Monte hè una pianura. Billissime viste di u Golfu di Portu, è di l'internu di e tarre, cù i paesi di u Seve Ingrentu.
Antoine hà inalzatu un bellu cairn, è appitticatu una bandera chjuca. I dui cairn (quellu cù a croce è quellu cù a "bandera"), masimu u sicondu, sò visibuli da Marignana cù un paghju di cannuchjali (ingrandimentu x8)
U pianu di a cima di u Capu à u Monte. In fondu, Campughju.
Vista di 360 gradi da a cima di u Capu à u Monte.