13) u Capu à a Cuccula, 2049 m : da a Bocca à Verghju à u Capu à a Cuccula
Partanza : | da a Bocca à Verghju, 1478 m |
Distanza : | circa 3,5 km (andà) |
Slivellu : | 571 m |
durata : | 1,5 - 2,5 ore (andà) |
Difficultà d'orientazione : | mudarata, ma attinzione è ossirvazione richersa (cairn ma micca andati) |
Difficultà fisica : | abbastanza difficiule, una cullata hè bella arritta |
Rimarche : | monte suvente ammantatu da i nuli |
Carte |
© IGN PARIS 2007 |
|
Si parte da a Bocca à Verghju (1478 m) è à a prima si deve righjunghje un arbure sulignu. Una traccia ci cunduce. Da quallà cuntinuà à circà tracce è principi d'andati chì collanu piuttostu versu u punente, è righjunghje un pinu isulatu dinò. Si vede da a partanza un iscogliu particulare :
Hè situatu une poche di dicine di metri à dritta di u puntu chì ci si ghjunghjarà annant'à a cresta innanz'à a parte finale di a spassiata.
Ci hè uni pochi di cairn (bassi) è una prima "cansa" à u livellu d'un filicaghju (5 minuti dopu u principiu). Piglià a traccia di manca.
Si ghjunghje dopu ind'un'aghja pitricosa è avà i cairn sò parechji. Un pocu à l'insù, certe tracce sò largamente visibule.
Dopu circa 25 minuti si ghjunghje à una spezia di pianata più stesa, cù ruvine di mandrie. I cairn s'avvedenu di menu, è ci vole à avvicinassi un pocu è à piglià à dritta versu una cullatella.
Torna ci hè una rimpianata (circa 1804 metri). Dendu un'uchjata à u livante, vista d'un pozzu è più inghjò, di i pozzi di Catamalzi. (tutti secchi annant'à a futtò)
Fidiendu à u punente, l'ultima cullata (arritta assai) innanzu di ghjunghje à a cresta (à un'altitudine di circa 1950 metri).
Dopu cullatu a cresta, vista in daretu, in particulare di a cullata ritta ritta. Da nutà chì a Bocca à Verghju hè videvule di manera sguasgi parmanente fin'à a cresta.
Da u listessu locu, si vede à Marignana è in fondu u Golfu di Saone.
Sempre da u listessu locu, a cresta chì ci vurrà à parcorre fin'à a cima attundulita di u Capu à a Cuccula à manca. U prima pinzu visibule in lu centru hè a Punta à e Incricche (2057 m).
Vista da a prima bocca (inannz'à a Punta à e Incricche) versi a Paglia Orba è u Capu Tafunatu. Ci si vede u rifugiu di Ciottulu à i Morri (appena appena annant'à u ritrattu quì sottu).
L'ultima parte hè fatta di blocchi è d'alzi fastidiosi abbastanza da travirsà. Attenti à ùn perde micca di vista i cairn. Senza di què, daria ancu più fastidiu issa teppa. In fine, si pò spichjà a bella croce.
Vista da a cima versu u Filosorma è uni pochi di i so paesi. Bella vista dinò di a Bocca di Caprunale è di a cullata ver'di Vagnarola.
Vista versu i golfi di Portu è di Saone. Quaghjò u Capu d'Ortu, u Capu di u Vitullu è u Capu à u Monte. Da nutà ch'ellu si pò vede megliu u rughjone andendu à u capu di u pianu quì sottu.
Si vede appena u lagu di Ninu, chì pare una tacca bianca chjuca chjuca. A siconda futtò hè stratta da a prima ma lasciendu a taglia vera di a futtò (taglia riale di e futtò di u situ : 3072x2304, innanzu d'esse achjuculite in 1024x768).
Da a cima si pò lampà un ultimu sguardu à a Paglia Orba è u Capu Tafunatu.