U Capu à l'Acella hè u nome ch'elli danu i Marignanesi à sta cima chì suprana a Bocca à Seve è u Fiuminale. I Cristinaccesi parenu di chjamalla u Capu Sant'Anghjulu o Capu Sant'Agnulu, ed hè issu nome ch'hè ripirturiatu annant'à e carte di l'IGN (cù un isbagliu di scrittura : Capu Sant'Anghiulu).

Si trovanu in cima e ruvine di a cappella Sant'Anghjulu (da vede a rubrica Storia è Patrimoniu),

A partanza si face da u pilonu di sopr'à a Bocca à Seve. Ci vole à falà a pendita dolce marchjendu ver'di a cima, eppo' cumincià à cullà puntendu à manca à via di i scogli. Si tratta quì d'avvigne l'alzi è l'altre piante alte ch'imbroglianu a vista è a prugrissione. Face ch'ùn si colla sguasgi micca, è a prugrissione si face sicondu e curve di u livellu. Da i scogli, bella vista versu i Dui Sorru è i paisoli rinnesi. Dopu avvintu a vegetazione, si pò turnà à cullà francamente, pigliendu appena à dritta (ver'di u pilonu). Dopu si pò cullà à vista senza ostaculu o impidimentu maiò. L'ultimi metri sò arritti.

A cima hè larga (è brutta) assai. Offre una vista fin'à u Capu Sanincu è Portu. S'avvede à Ota è à Chidazzu. Bella vista versu e creste di Marignana è u Fiuminale, è dinò versu i monti piaghjinchi. Da l'altra banda, si vede faciule u Pianu di Mozzu, Rennu, è à a luntana s'induvina à Vicu. Di sicuru, si vede ancu a Punta di a Spusata, u Trittore è u Monte Ciarbellu. Fidiendu ver'di l'internu, si vedenu i monti principali. Da nutà a bella vista di a Bocca San Petru.

Da u Capu à l'Acella