c) Situazione è nomi di u rughjone : a pieve eppo u cantone

 

U rughjone di Marignana hè statu amministrativamente numinatu di manere sfarente pà i seculi :

U prima nome cunnisciutu da insignà u rughjone hè di sicuru quellu di a pieve : Sevendentro, o calchì volta Sevenentro, almenu à parte da u 16imu seculu, è sigondu u nome di a bocca à l'entre di u rughjone (Bocca à Seve, 1101 metri).

In lu 1485, si ponu cuntà e cummunità d'Evisa, di e Cristinacce, di u Pughjolu (paisolu d'Evisa, oghje svanitu), a Valle (oghje sparitu), u Tassu. Marignana è Chidazzu pare ch'elli ùn esistissinu ancu micca tandu.

Hè cunfinante cù a pieve di Sia, posta in lu latu nordu di u fiume u Sia (oghje numinatu u Portu) è chì cuntene e cummunità di Curzu, Vetricia (prununcia : vè-tricia), Pinitu (prununcia : pi-nitu), Sia, Astica (prununcia : a-stica) è Ota, cù quella di Salogna, ind'elli si trovanu u Campu, a Piana, a Rimullaccia, Vistale è Revinda è dinò cù quella di Paomia, chì a so sola lucalità hè Paomia.

 

Carta apprussimativa di e pieve à parte da a fine di u 15imu seculu

Pusizione apprussimativa di i paesi è paisoli ughjinchi

In lu 1771 hè criatu un novu nome di pieve : u "Sevinfuori" (incù Ota è Piana) è chì currisponde dunque à e pieve di Salogna è Sia  è si trattarà da u 1790 in là di "cantone". Eccuci sottu e cunfine di i cantoni di sta parte di a Corsica (e limite sò cambiati suvente, stu ducumentu hè esattu oghje, ma apprussimativu, è dunque solu indicativu, in quant'à u passatu) :

 

Carta di i cantoni ingir'à i dui Sevi  (carta di l'INSEE mudificata - geoFLA®©IGN INSEE 2006)

 

 

 

 

Oghje, issi dui cantoni sò stati riuniti, è si parla di "i Dui Sevi".

 Rimarca : à prupositu di u nome "Sevi"

ci hè da nutà chì u nome veru di a bocca è dunque di u rughjone hè "Seve" è micca "Sevi". Nealmente quessu quì ferma a virsione ufficiale ed hè oghje sparta ancu frà a ghjente. Si pudarà spiegà sia da a tuscanizazione di i nomi corsi in li tempi è u fattu chì l'ammistrazione francese l'aghja tinuta, sia da a prununcia "Sev'ingrentu" è "Sev'in fora", ch'avia pudutu sbaglià a ghjente fenduli crede ind'una "i" finale, invece di "Seve'ngrentu" è "Seve'n fora" . L'ultima prununcia, in più d'esse cummuna in lu rughjone, avaria parmessu di cuntinuà à sente l'ultima lettara di Seve, è dunque a cunsirvazione di a parolla "sputica".

Certi abitanti d'issi lochi u chjamanu calchì volta "u Pumonte" (ciò chì pò cagiunà una cunfusione - da vede quì sottu) : in irrialità, hè à un tempu u nome di a Corsica Suttana sana è quellu di u rughjone punente sopr'à Aiacciu, ma forse causa d'esse in cuntattu direttu incù a Corsica Suprana (hè infatti u "principiu" di a Corsica suttana), è particularmente incù i Niulinchi ch'arruchjavanu u rughjone par impiaghjà è dopu muntagnà, sarà statu numinatu cusì u rughjone in cuntrastu cù u Cismonte.

 U Pumonte hè cunfinatu da e bocche à Verghju è à Seve à l'internu, è da e cummune di Carghjese è d'Osani da l'altra parte. Tocca dunque u mare.

 

 

Vista sguasgi ginerale di u Pumonte

 

 
 

 
  Ligenda : 1 : Marignana | 2 : Bocca à Seve (1101 m) | 3 : Bocca di Verghju (1477 m) | 4 : Carghjese | 5 : Osani | 6 : Evisa | 7 : Portu | 8 : Furesta d'Aitone.  

 

Rimarca : à prupositu di a Corsica suttana

● Hè situatu Marignana in Corsica suttana, parte miridiunale è dilimitata di manera naturale da i monti cintrali di a Corsica, è ch'hà cunnisciutu parechji nomi sicondu i seculi :

- 1 ) u "Di là dei Monti" (appostu à u "Di quà dei Monti"), o incù u listessu sensu "u Pumonte" (appostu à "u Cismonte"). "Di là" è "Di quà" facenu rifarenza à a pusizione di a Corsica riguard'à Ghjenuva.

- 2 ) Si trattava dinò di "a Banda di Dentro" (Corsica Suprana) è di "a Banda di Fuori" (Corsica Suttana)

- 3 ) Iss'alluntanamenti naturali è sfarenti da Ghjenuva anu arricatu cunsiguenze in fatti d'usi è d'amministrazione : face chì si parlava dinò in quelli tempi di "a Terra di u Cummunu" (cù un ispartimentu di e tarre piuttostu ghjustu, è sottumessa à u pesu di Ghjenuva, più vicina, è di u so modu di rigenza) è di " a Tarra di i Signori" (ind'ì quella u putere li scappava à Ghjenuva, è andava masimu à "signori" lucali).

- 4 ) In lu piriudu francese dinò, e parte di a Corsica anu cambiatu nome :

prima, in lu 1790, a Corsica sana era un solu dipartimentu, ma trè anni dopu, sò stati criati dui dipartimenti : "u Liamone" pà u Pumonte, è "u Golu" pà u Cismonte. Tuttavia, in lu 1811 si torna à un solu dipartimentu. In fatta fine, dui dipartimenti sò messi in piazza in lu 1976 : "la Corse-du-Sud", è "la Haute-Corse".

In lingua corsa, ci si rifirisce in ginerale cù i tarmini "Corsica suttana" è "Corsica suprnana", o ancu "Pumonte" è "Cismonte".

 

Vultà