● U paese di Marignana hè postu in fond'à a valle di u Golfu di Portu, à circa 10 chilometri in linia d'aria da u mare, è face parte d'un cantone chjamatu amministrativamente i Dui Sevi.
Pà u stradò, hè luntanu circa 6 chilometri da Evisa, 5 chilometri da e Cristinacce, è 19 chilometri da Niolu.
A cummuna di Marignana tocca 7 altre cummune : Evisa, e Cristinacce, Rennu, Balogna, Carghjese, a Piana, è Ota.
● Hè appesu u paese à u Monte Sbacchellu (Monte Petricce annant'à e carte IGN altu 1010 metri), è si stende à un' altura cumpresa trà 700 metri è 770 metri (toccanu ancu 800 metri certe case), è à l'umbriccia . A ghjesgia è u core di u paese sò à circa 730 metri d'altitudine.
Marignana appesu à u Monte Sbachellu (a casa à manca strema hè à 800 m d'altura)
Marignana vistu da e Petre Bianche. A dritta, u Capu à l'Acella (1273 metri) chì suprana a Bocca à Seve, è à manca, u Capu à a Cuccula (2049 metri) di sopr'à Evisa
