● Ci sò nati in Marignana uni pochi di parsunaghji celebri :
- Coppolani Saveriu (Marignana 1866 - Mauritania 1905) : Cunquistadore pacificu di a Mauritania, è dopu u so amministratore.
placca cumimurativa in onore di Saveriu Coppolani - Marignana, piazza di a Funtana Maiò
un libru conta a so vita, da Georges Coppolani, edizione L'Harmattan
- Versini Dumenicantone (Marignana 1872 - Aiacciu 1950) : pueta di lingua corsa, cunnisciutu sott'à u cugnome di Maistrale, cullaburatore di u ghjurnale " A Muvra" di Petru Rocca.
placca cumimurativa in onore di Maistrale,posta in le Forgule, u so locu di nascita
Hà publicatu a racolta "Risa è Canti", editata torna di pocu da l'edizione l'Ammaniti:
- Versini Ghjacumu Santu (Marignana 1867 - Aiacciu 1922) : scrittore è pueta di lingua corsa. Stututore di prufissione, è fundadore incù Saveriu Paoli di a rivista " a Cispra" in lu 1914.
placca cumimurativa in onore di Ghjacumu Santu Versini, appitticata à una casa di a Tarriccia
Eccu u so puema u più cunnisciutu :
Neve
I grataghji fulighjinosi
Anu le so faldette bianche
E fate, ch’ùn sò mai stanche,
L’anu fatti cusì pumposi
I grataghji fulighjinosi !
I licciaconi è li pulloni
L’hà vistuti tutti lu ventu
Di causgiulelle d’argentu.
Sbacuneghjanu da ricconi
I licciaconi è li pulloni !
U sole hè spentu. U celu piegne.
Più tarra. Più monti. Più machja.
Un nuvulu di corbi grachja.
Malacci à ch’ùn hà ghjuntu legne !
U sole hè spentu. U celu piegne.
Neva, neva, è neva fiori !
Di biancu s’impanna lu mondu,
Bellu granu sarà più tondu
Pà i buiaghji è li pastori.
Neva,
neva è neva fiori !
(publicatu
ind'ì
A Cispra, di
marzu
di u 1914,
senza l’ultima stanza
ch'hè
stata aghjustata dopu ind'ì l’antulugia
di Matteiu Ceccaldi in lu 1973, è ind'ì quella di Ghjacintu Yvia-Croce in lu
1987, incù l'aiutu d'anziani allevi di Ghjacumu Santu Versini)
● U paese hè u locu principale di l'azzione di u rumanzu storicu "Fleuve de Sang" da Marcaggi, publicatu in lu 1898, chì conta a storia d'una vindetta pruduttasi in lu mezu di u 19imu seculu trà i Massoni è i Pizzini, tutti di Marignana. A so viulenza è e prupurzione ch'ella avia pigliatu a vindetta avianu stumacatu è rimusciatu l'abitanti.
edizione Alain Piazzola è a Messagera
